ครูปเทสลาภี จ, อตฺถสารสมายุโต;
สทฺธมฺมํ ปริปาเลนฺโต, สทฺธมฺมสฺมา น หายติฯ
สทฺธมฺมตฺถาย เม ตสฺมา, สงฺขฺยามาลาปิ ภาสิตา;
สปฺปโยคา ยถาโยคํ, สเหวตฺถวินิจฺฉยาฯ
อิติ นวงฺเค สาฏฺฐกเถ ปิฏกตฺตเย พฺยปฺปถคตีสุ วิญฺญูนํ
โกสลฺลตฺถาย กเต สทฺทนีติปฺปกรเณ
สวินิจฺฉโย สงฺขฺยานามานํ นามิกปทมาลาวิภาโค
นาม
เตรสโม ปริจฺเฉโทฯ
14. อตฺถตฺติกวิภาค
ภูธาตุ ตาย นิปฺผนฺน-รูปญฺจาติ อิทํ ทฺวยํ;
กตฺวา ปธานมมฺเหหิ, สพฺพเมตํ ปปญฺจิตํฯ
ภวติสฺส วสา ทานิ, วกฺขามตฺถตฺติกํ วรํ;
อตฺถุทฺธาโร ตุมนฺตญฺจ, ตฺวาทิยนฺตํ ติกํ อิธฯ
ตสฺมา ตาว ภูธาตุโต ปวตฺตสฺส ภูตสทฺทสฺส อตฺถุทฺธาโร นียเต –
ขนฺธสตฺตามนุสฺเสสุ, วิชฺชมาเน จ ธาตุยํ;
ขีณาสเว รุกฺขาทิมฺหิ, ภูตสทฺโท ปวตฺตติฯ
อุปฺปาเท จาปิ วิญฺเญยฺโย, ภูตสทฺโท วิภาวินา;
วิปุเล โสปสคฺโคยํ, หีฬเน วิธเมปิ จ;
ปราชเย เวทิยเน, นาเม ปากฏตาย จฯ
วุตฺตญฺเหตํ – ภูตสทฺโท ปญฺจกฺขนฺธามนุสฺสธาตุวิชฺชมานขีณาสวสตฺตรุกฺขาทีสุ ทิสฺสติฯ ‘‘ภูตมิทนฺติ ภิกฺขเว สมนุปสฺสถา’’ติอาทีสุ หิ อยํ ปญฺจกฺขนฺเธสุ ทิสฺสติฯ